SMACH.
SMACH é na mostra alaleria che se joa dl binom ert y natöra, olache chëst’ultima é le post por les aziuns artistiches „site specific“ metüdes te localités d’interes storich-cultural ti comuns de nosta valada.
N concurs d’ert internazional
SMACH é n evënt bienal cherié da Michael Moling, cun la colaboraziun de Gustav Willeit y Katharina Moling. I artisć chiris fora vëgn damaná da realisé sües operes te posć particolars sternüs fora tles valades dolomites, tl tëmp ch’ai sojornëia chiló. Na iuria internazionala chir fora i pröms diesc che ciafa n pest de scioldi y la mostra é spo da odëi dai pröms de messé cina i pröms de setëmber, a n’altëza danter i 1.100 y i 2.800 metri. Tl’ultima ediziun él rové ite indöt 1061 proiec da vigni pert dl monn: n numer che cun le tëmp é chersciü tres deplü y che confermëia n interes tres majer ti confrunc de na manifestaziun unica tl raiun ladin.
La iuria 2021 é metöda adöm da: Guus van den Hout – Presidënt dla iuria, Julia Bornefeld, Gehard Demetz, Giacinto Di Pietrantonio, Giulia Ferracci, Michael Moling – Consulënt y presidënt de SMACH, Katy Moling – Consulënta y vicepresidënta de SMACH, Gustav Willeit – Consulënt y mëmber dla comisciun de SMACH.
La mostra permanënta
Dan da püch él gnü cherié la Val dl’Ert, olache la mostra permanënta dles scoltöres dles ultimes ediziuns dl concurs d’ert SMACH á ciafé lerch. Ara se trata de n’atra evoluziun de n proiet che se svilupëia tres inant.
N proiet a 360°
Nosc stüde ne n’á nia ma ciafé fora y cherié düc i materiai de comunicaziun – logo, plata internet, materiai de devulgaziun, inserac, tofles y döt ci ch’á da fá cun indicaziuns en general, istalaziuns, comunicac stampa y social media – mo se dá jö ince cun la gestiun di scioldi, se crüzia de tó ite i artisć, dla logistica di materiai y dles operes. I cherdun dassënn te chësc proiet y i metun ite energia, pasciun, entusiasm te n evënt ch’i oresson che ti jiss tres plü a cör ala jënt y che foss bun da valorisé le raiun dolomitich te na manira alternativa y dalunc dai cliché liá da dagnora incá al turism y al sfrutamënt intensif de nosta valada.
Evënc artistics, posć por mostres, istalaziuns: i dun vita a to proiet nü.
Pulsëia cun nos